மரிய லூர்தம்மாள் சைமன்

*மரிய லூர்தம்மாள் சைமன்*

முன்னாள் உள்ளாட்சி மற்றும் மீன்வளத்துறை அமைச்சர் பெருமதிப்பிற்குரிய லூர்தம்மாள் சைமன் அவர்களின் நூற்றாண்டு விழாவை அரசு விழாவாக கொண்டாடவேண்டும் என்னும் வேண்டுகோளை நண்பர் குறும்பனை பெர்லின் தொடர்ந்து அரசிற்கு வைக்கின்றார். அந்த கோரிக்கை என்னவானது என்பதை “மாண்புமிகு லூர்தம்மாள் சைமன் நூற்றாண்டு – குப்பையில் போன கோப்புகள்” என்னும் புத்தகம் வழியாக ஆவணப்படுத்தியுள்ளார். லூர்தம்மாள் சைமன் அவர்களுக்கு சிலைவைக்கவேண்டும், அவர் பிறந்த ஊரான மணக்குடி கிராமத்திலிருக்கும் பாலத்திற்கு அவர் பெயர் சூட்டவேண்டும், தேங்காய்பட்டணம் துறைமுகத்திற்கு அவர் பெயரை வைக்கவேண்டும், குளச்சலில் ஒரு மணிமண்டபம்  கட்டவேண்டும் என்னும் எளிய கோரிக்கைகளுக்குக்கூட போராடவேண்டியிருப்பது வருத்தமானது.

[இந்த புத்தகத்திலிருக்கும் ஒரு சிறு தவறை வெளிப்படையாக சுட்டிக்காட்டவேண்டியிருக்கின்றது. லூர்தம்மாள் சைமனின் பிறந்த நாளாக 26/09/1911 என்று சொல்லப்பட்டுள்ளது. இதைப்போல, ஏற்கெனவே வெளிவந்த ஜோ. தமிழ்செல்வனின் “உள்ளாட்சி & மீன்வளத்துறை மந்திரி லூர்தம்மாள் சைமன்” என்னும் புத்தகத்திலும் 26/09/1911 என்பதே பிறந்தநாளாக சொல்லப்பட்டிருக்கின்றது. அதுபோல் அரசிற்கு வைக்கப்பட்டிருந்த கோரிக்கையிலும் 26/09/1911 என்று பிறந்த நாளாக சொல்லப்பட்டு, 2011 நூற்றாண்டுவிழா கொண்டாடவேண்டுமென்றும் கேட்டுக்கொள்ளப்பட்டது. ஆனால், அரசு ஆவணப்படி அவரது பிறந்த நாள் 26/09/1912. இந்த தவறை சரிபார்த்து திருத்தம் செய்ய அன்பாய் கேட்டுக்கொள்கின்றேன்.]

காங்கிரஸ் பேரியக்கம் பல தன்னலமற்ற ஒப்பற்ற தலைவர்களை உருவாக்கியது. கேரளக்கடற்கரையைப் பொறுத்தவரையில் கே. காமராஜரின் அமைச்சரவையில் இடம்பெற்ற மரிய லூர்தம்மாள் சைமன் மற்றும் ஜவகர்லால் நேருவின் அமைச்சரவையில் இடம்பெற்ற ஆனி மஸ்கரின் என்னும் இரண்டு சிறுபான்மை சமூகத்தைச்சார்ந்த பெண்தலைவர்கள் மிக முக்கியமானவர்கள். தமிழ் நாட்டின் பொருளாதார வளர்ச்சியில், ஊழல்கறை படியாத, அமைச்சர் லூர்தம்மாள் சைமன் அவர்களின் பங்களிப்பு மிகப்பெரியது. அவர் கொண்டுவந்த நலத்திட்டங்கள், மீனவர்களின் மீதான அவரது பாசம், அவரது மனிதாபிமானம், அவரை அரசியலிலிருந்து திட்டமிட்டு நிர்மூலமாக்கியது என்பனவற்றை இந்த புத்தகம் விரிவாக அலசுகின்றது.

மரிய லூர்தம்மாள் சைமன், 1912ம் வருடம் செப்டம்பர் 26 நாள் மணக்குடி கடற்கரைகிராமத்தில்  பிறந்தார். நாகர்கோவில் செயிண்ட் ஜோசப் கான்வென்டில் பத்தாம் வகுப்புவரை ஆங்கிலவழியில் படித்து அதே பள்ளியில் ஆங்கில ஆசிரியராகவும் வேலைபார்த்தார். அவரது கணவர் சைமன் அலெக்சாண்டர் அவர்கள் கொல்லங்கோடு மற்றும் விளவங்கோடு தொகுதிகளில் வென்று இரண்டுமுறை திரு-கொச்சி சட்டமன்ற உறுப்பினராக இருந்தவர். கன்னியாகுமரி தமிழகத்துடன் இணைந்தபிறகு 1957ம் வருட தேர்தலில் பெருந்தலைவர் காமராஜரால் அறிமுகப்படுத்தப்பட்டு, குளச்சல் சட்டமன்ற தொகுதியில் போட்டியிட்டு வென்று, கே. காமராஜரின் இரண்டாவது அமைச்சரவையில் உறுப்பினரானார்.

தமிழகத்தின் தொழில் வளர்ச்சிக்கு அடித்தளமிட்ட பெருந்தலைவர் காமராஜரின் ஆட்சியில், உள்ளாட்சித்துறை மற்றும் மீன்வளத்துறை அமைச்சராக லூர்தம்மாள் சைமன் பொறுப்பிலிருந்தது நமது நல்லூழ். காமராஜரின் அனைத்து நலத்திட்டங்களையும் வெற்றிகரமாக செய்துமுடிக்க பி.கக்கன்,  ஆர். வெங்கட்ராமன், எம்.பக்தவச்சலம், சி.சுப்ரமணியம் போன்ற தலைவர்களுடன் உறுதுணையாக நின்றார்.

இந்திய பல்கலைக்கழக மாணவர்களுக்கு இலவச மதிய உணவுத்திட்டதை நடைமுறைப்படுத்தியிருந்த   அமெரிக்க தொண்டு நிறுவனமான கேர் (CARE – Cooperative for Assistance and Relief Everywhere) அமைப்புடன் இணைந்து தமிழகத்தில் கே. காமராஜர் மதிய உணவுத்திட்டத்தை அறிமுகப்படுத்தினார். இதனை உள்துறை அமைச்சர் லூர்தம்மாள் சைமன் விரிவுபடுத்தி அனைத்து கிராமங்களுக்கும் கொண்டுசென்றார் என்று அரசு அறிக்கை சொல்கின்றது. இதனால் சுமார் 14 லட்சம் குழந்தைகள் பயனடைந்தார்கள்.

இதைப்போல், காமராஜரின் கல்வித்திட்டத்தை அனைத்து கிராமங்களிலும் செயல்படுத்தினார். குறிப்பாக கன்னியாகுமரி மாவட்ட கடற்கரையில் அனைத்து குழந்தைகளும் கல்வி கற்பதில் மிகுந்த அக்கறைகாட்டினார். பொதுவாக கடல்சார்ந்த பிரச்சனைகள் வரும்போது, மீனவர்கள் கல்வி கற்று மாற்று வேலைகள் தேடவேண்டும் என்று அறிவுரைகள் சொல்லப்படுவதுண்டு. இது கடற்கரைகளில் கல்வியறிவு இல்லை என்னும் பொதுப்புத்தியின் மாயத்தோற்றம் மட்டுமே. 2010வருடத்தின் தமிழக கடற்கரை மீனவர்களின் கணக்கெடுப்பின்படி, கன்னியாகுமரி கடற்கரை மீனவர்களின் கல்வியறிவு 94.66 சதவிகிதம். இது வேறெந்த சமூகத்திற்கும் குறைவானதல்ல. இதில் லூர்தம்மாள் சைமனின் பங்களிப்பு முக்கியமானது.

தமிழகம் முழுவதும் ஊராட்சி மன்றங்களை (பஞ்சாயத்து ராஜ்) செயல்படுத்தியதை லூர்தம்மாள் சைமன் அவர்களின் முக்கியமான சாதனையாகச் சொல்லலாம். 1958ம் வருடம் மெட்ராஸ் பஞ்சாயத்து , அமைச்சரவையால் ஒப்புதல் அளிக்கப்பட்டு, 1959ம் வருடம் சட்டமாக்கப்பட்டது. 1960 வருட காந்தி ஜெயந்தி நாளிலிருந்து ஊராட்சி மன்றங்கள் மூன்று கட்டமாக, 32 மாதகாலத்தில் செயல்முறைப்படுத்தினார். 1962ம் வருடத்தில் 12,360 ஊராட்சிகள், 597 பேரூராட்சிகள், 374 பஞ்சாயத்து யூனியன்களையும் உருவாக்கி காந்தியின் கனவுத்திட்டத்தை தமிழக கிராமம் முழுவதும் கொண்டுசென்றார்.

1956ம் வருட நிலவரப்படை, நாகர்கோவில் அரசு மருத்துவமனையில் 48 படுக்கை வசதிகளே இருந்தது. இந்த மருத்துவமனையை விரிவுபடுத்த லூர்தம்மாள் சைமன் காமராஜரிடம் வேண்டுகோள் வைத்தார். அவரின் வேண்டுகோளை ஏற்று, 1960ம்வருடம் 4.5 ஏக்கர் நிலப்பரப்பில் அனைத்து வசதிகளும் கொண்ட, 140 படுக்கை வசதிகளுடன், புதிய மருத்துவமனைக்கான அடிக்கல் நாட்டப்பட்டது. இதனால் எண்ணற்ற ஏழைகள் பயனடைந்தார்கள். இன்று அது  தமிழகத்தின் தலைசிறந்த மருத்துவக்கல்லூரியாக வளர்ந்து நிற்கின்றது.

ஆனால், காமராஜர் புதிய மருத்துவமனைக்கு ஒப்புதல் அளித்ததை நாகர்கோவில் உள்ளூர் மருத்துவர்கள் விரும்பவில்லை. தனியார் மருத்துவர்கள் மற்றும் அவர்களது ஆதரவாளர்களால் லூர்தம்மாள் சைமன் அடுத்த தேர்தலில் தோற்கடிக்கப்பட்டார். அரசு மருத்துவமனையை செயல்படுத்தினால் உள்ளூர் காங்கிரஸ்காரர்கள் தனக்கு எதிராக செயல்படுவார்கள் என்பதும், தனக்கு அரசியல் எதிர்காலம் இருக்காது என்பதை அவர் அறிந்திருந்தும் பொதுமக்களின் நலனுக்காக மட்டுமே செயல்பட்டார். இதுபோன்ற சுயநலமற்ற செயல்பாடுகளுக்கு உறுதியான ஆன்ம பலமும், நேர்மையும் வேண்டும்.

இரண்டாவது ஐந்தாண்டு திட்டத்தின் ஒருபகுதியாக, மணிமுத்தாறு, வைகை அணைத்திட்டங்கள், கிராமங்களுக்கான அடிப்படை மின்சார வசதிகள், அடிப்படை சுகாதாரம் என்று பல நலத்திட்டங்கள் தமிழகத்தில் காமராஜரால் நடைமுறைப்படுத்தப்பட்டன. மணிமுத்தாறு அணைக்கட்டு அமைச்சர் லூர்தம்மாள் சைமன் அவர்களால் துவக்கிவைக்கப்பட்டது.

ஐந்தாட்டுத்திட்டதின் ஒரு பகுதியாக மீனவர்களுக்கு விசைப்படகுகளும் நைலான் வலைகளும் அறிமுகப்படுத்தப்பட்டது. விசைப்படகுகள் தமிழகத்தின் தென்மேற்கு கடற்கரையின் பொருளாதாரத்தை நினைத்துப்பார்க்க முடியாத அளவிற்கு உயர்த்தியது. கன்னியாகுமரி மீனவர்கள் ஆழ்கடல் மீன்பிடிப்பில் ஒப்பற்றிருப்பதற்கு இதுவே அடித்தளம் அமைத்தது. பாரம்பரியத்தை இழக்காத புதிய தொழில்நுட்பத்தை வளர்த்தெடுப்பதிலேயே அவர் ஆர்வம் காட்டினார். [லூர்தம்மாள் சைமன் அவகளின் காலகட்டத்திற்குப் பிறகு, திமுக அரசால் இழுவைமடிகள் தமிழகத்தில் அறிமுகப்படுத்தப்பட்டது.]

பெருந்தலைவர் கே. காமராஜர் அல்லது பி. கக்கன் என்று சொல்லும்போது, நமக்கு லூர்தம்மாள் சைமன் என்னும் பெயரும் ஞாபகத்திற்கு வரவேண்டும். ஆனால், அவரது பெயரை அவர் சார்ந்த மதம் மற்றும் ஜாதியை காரணம் காட்டி, அவரது பங்களிப்பை மறைப்பது எந்த விதத்திலும் நியாயமாகாது. இது ஒரு வரலாற்றுப்பிழையாகவே எதிர்காலத்தில் எஞ்சும்.

இந்த நூலில் பல நெகிழ்ச்சியான, லூர்தம்மாள் சைமன் அவர்களின் மனிதநேயம் மிக்க சம்பவங்களும் இதில் சொல்லப்படிருக்கின்றது. இந்த நூலில் சொல்லப்பட்டிருக்கும் வேண்டுகோள்கள் அனைத்தும் காங்கிரஸ் கட்சி சார்பில் முன்னெடுத்துச் செல்லவேண்டியவை. ஆனால், இன்றைய காங்கிரஸ்காரர்களுக்கும் லூர்தம்மாள் சைமன் யாரென்று தெரியாமலிருப்பது வியப்பாக இருக்கின்றது. ‘காங்கிரசை காங்கிரசே அழிக்கும்’ என்பதற்கு இது ஒரு சிறந்த உதாரணம். இருப்பினும், விடாப்பிடியாக, இந்த வேண்டுகோள்களை மீனவர்களின் உரிமையாக எடுத்துக்கொண்டு தொடர்ந்து சாத்வீக வழியில் போராடும் நண்பர் பெர்லின் அவர்களுக்கு என்னுடைய அன்பும், பாராட்டுகளும். உங்கள் கனவு மெய்ப்படும் என்று நம்புவோம். வாழ்த்துகள்!!!

[“மாண்புமிகு லூர்தம்மாள் சைமன் நூற்றாண்டு – குப்பையில் போன கோப்புகள்” என்னும் புத்தகத்திற்கு எழுதிய அணிந்துரை]

குளச்சல் யுத்தம்

நண்பர் என்.டி. தினகர் மற்றும் பாதர். கிளாரட் ஆன்றணி அவர்களும் எழுதிய குளச்சல் போர் குறித்த புதிய புத்தகம் தற்போது வெளிவந்துள்ளது. இந்த புத்தகம் மார்க் டி.  லெனாய் எழுதிய “The kulasekara perumals of Travancore – History and state formaton in Travancore from 1671 – 1758” என்னும் ஆய்வுநூலை அடைப்படையாகக்கொண்டு எழுதப்பட்டுள்ளது.  இந்த ஆய்வு நூலின் தமிழாக்கமும் இந்த புத்தகத்துடன் இணைக்கப்பட்டுள்ளது. [நண்பர் என்.டி. தினகர், திருவிதாங்கூர் சார்ந்த வரலாற்றாய்வில் மிகுந்த ஆர்வம் கொண்டவர்.]

பொதுவெளியில் நமக்குத்தெரிந்தது, குளச்சல் போரில் டி. லெனாய் தலைமையிலான டச்சுப்படை மார்த்தாண்டவர்மாவிடம் சரணடைந்தது என்றுதான் இதுவரை படித்துக்கொண்டிருக்கின்றோம். ஆனால், டி. லெனாய் கன்னியாகுமரியிலிருந்த டச்சு முகாமிலிருந்து வெளியேறி, மார்த்தாண்டவர்மாவுக்காக குளச்சல் டச்சுப்படைகளை முழுமையாக சரணடைய உதவினார் என்பது ஒரு புதிய தகவல். அதுபோ, குளச்சல் யுத்தத்தில் திருவிதாங்கூர் படையில் அனைத்து சமூக மக்களும் இருந்தார்கள், கடலில் யுத்தம் ஒருபோதும் நடக்கவில்லை என்பதுபோன்ற தகவல்களை ஆணித்தரமாக நிறுவுகின்றது.

குளச்சல் யுத்தத்திற்கான, மூலகாரணங்களை, அரசியல், பொருளாதார காரணங்களை இந்த நூல் சுருக்கமாக பேசுகின்றது. 400 டச்சுப்படை வீரர்களை இருபதாயிரத்துக்கும் மேலான திருவாங்கூர் படையினரால் ஏன் எதிர்க்க முடியவில்லை என்பதற்கான காரணங்கள் இதில் சொல்லப்பட்டுள்ளது. உள்ளூர் மீனவர்கள் ஏன் கிறிஸ்தவர்களான டச்சுக்காரர்களுக்கு ஏன் உதவவில்லை என்பதை அறிய டச்சு மற்றும் போர்ச்சுகல் நாடுகளுக்கிடையிலான உள்ளூர் பிரச்சனைக்கக்கு செல்லவேண்டும்.

யானை என்பது ஒரு அரசன். யானையை சீண்டுவததென்பது அந்நாட்டு அரசனை சீண்டுவதுதான். மலபாரில் போர்ச்சுக்கீசியர்களால் கோழிக்கோடு சாமுத்திரிக ராஜாவை தோர்க்கடிக்க முடியவில்லை. அதற்கு முழுக்காரணம் சமுத்திரிக ராஜாவின் கடற்படையை நடத்திய மரக்கார் குஞ்சாலிகள். ஒரு கட்டத்தில், போர்ச்சுக்கீசியரை வெற்றிகண்டு பெருமிதப்பிலிருந்த நான்காம் குஞ்சாலி சாமுத்திரிக ராஜாவின் ஒரு யானைவின் வாலை அறுத்துவிடுவதன்காரணமாக கோபம்கொண்ட சாமுத்திரி, போர்ச்சுக்கீசியருடன் கூட்டு சேர்ந்து குஞ்சாலியை பழிவாங்குகின்றார். குஞ்சாலிகள் இல்லாத கோழிக்கோட்டை போர்ச்சுக்கீசியர்கள் எளிதாக வெல்கின்றார்கள். [உபயம்: கேஎம் பணிக்கரின் மலபார் மற்றும் போர்ச்சுக்கீஸ்] 

அதுபோல், 1939 முதல் 1743 வரை நடந்த திருவிதாங்கூர் யுத்தங்களின் துவக்கமான மார்த்தாண்டவர்மா காட்டுயானைகளை வேட்டையாடிய நெடுமங்காடு ஆனைப்பிடி பிரச்சனையிலிருந்தே துவங்குகின்றது. ஆனைப்பிடியிலிருந்து குளச்சல் யுத்தம் வரை இந்த நூலில் காணலாம்.

இந்த புத்தகம் மார்க் டி.  லெனாயின் ஆய்வுநூலுக்கு முக்கியத்துவம் கொடுத்து எழுதப்பட்டிருந்தாலும் இதில் சில *கடல்சார்ந்த* சம்பவங்களை சொல்லியிருந்தால் நன்றாக இருந்திருக்கும் என்று நான் நினைக்கின்றேன். முக்கியமாக,

  1. குளச்சல் யுத்தத்தில் டச்சுப்படையணியில் மீனவர்களும் இருந்தார்கள். சரணடைந்த மீனவர்களை சிறைவைத்த தகவல்கள் அடங்கிய மதிலகம் ஆவணங்கள் குறித்து இதில் எதுவுமில்லை.
  2. குளச்சல் யுத்தத்திற்கு கூடுதல் டச்சுப்படையணிகள் ஏன் சிலோணிலிருந்தோ அல்லது பட்டாவியாவிலிருந்தோ வரவில்லை. அதற்கான காரணங்கள் என்ன என்பது சொல்லப்படவில்லை.
  3. இலங்கைக்கான டச்சு கவர்னர் வான் இம்காஃ திருவிதாங்கூருக்கு வந்து மார்த்தாண்டவர்மாவுடன் பேச்சுவார்த்தை நடத்திய விவரங்கள் சொல்லப்பட்டுள்ளன. தேங்காய்பட்டினத்தில் வைத்து பேச்சுவார்த்தை நடத்தியதாகவும் இந்த நூலில் சொல்லப்பட்டுள்ளது. இது ஒரு புதிய தகவல். ஆனால்,  வான் இம்காஃ மற்றும் மார்த்தாண்டவர்மாவுக்குமான பிரசித்திபெற்ற உரையாடல் இதில் விடுபட்டிருக்கின்றது. எளயடத்து ஸ்வரூபம் (கொட்டாரக்கரா) இளவரசியை மார்த்தாண்டவர்மா சிறைவைத்தபோது, இளவரசி அதிலிருந்து தப்பி தெக்கம்கூர் சமஸ்தானத்திற்கு செல்வார். அப்போது, வான் இம்காஃ இளவரசிக்காக மார்த்தாண்டவர்மாவிடம் பேச்சுவார்த்தைக்கு வருவார். மார்த்தாண்டவர்மா இம்காஃபின் எந்த கோரிக்கைக்கும் ஒப்புக்கொள்ளவில்லை. அவர்கள் இருவரின் சம்பாஷணை:

“திருவிதாங்கூரை டச்சுப்படை கைப்பற்றும்” – இம்காஃ

“டச்சுப்படைகளின் சமாதி திருவிதாங்கூர் காடுகளில்” – மார்த்தாண்டவர்மா

“திருவிதாங்கூர் படை எங்கு சென்றாலும் டச்சுப்படை பின்தொடரும்” – இம்காஃ

“நான் எனது மீனவர்களையும் அவர்களது வள்ளங்களையும் கொண்டு ஐரோப்பாவை கைப்பற்றுவது குறித்து நீண்டகாலமாக யோசித்துக்கொண்டிருக்கின்றேன்.” – மார்த்தாண்டவர்மா

இந்த நூலை இன்னும் சிறிது விரிவாக ஆய்வு செய்திருக்கலாம் என்பது என்னுடைய அபிப்பிராயம். நான் மேலே சொன்ன என்னுடைய விருபங்கள் எதுவும் ஆய்வுநூலின் மதிப்பை எந்தவிதத்திலும் சிறுமைப்படுத்தாது. மொத்தத்தில் இது குளச்சல் யுத்தம் சார்ந்த ஒரு சிறந்த ஆய்வுநூல். வெளியீடு நகர்வு வெளியீட்டகம்.

மீனவர்கள் எதிர்நோக்கும் புதிய சவால்கள்

சமீபத்தில் ஆழ்கடல் மீனவர்களுக்கு சேட்டலைட் தொலைபேசி, நேவ்டெக்ச் (NavTex), மற்றும் நேவிக்(NavIC) கருவிகள் இலவசமாக அரசு அளிப்பதாக அறிவிப்புகள் வெளியாகியிருக்கின்றது. பாராட்டப்படவேண்டிய விசயம். இவை எளிய இலவசங்களல்ல, ஆழ்கடல் மீனவர்களின் உயிர்காக்கும் கருவிகள்.  உண்மையில் ஆழ்கடல் மீனவர்களுக்கு கிடைக்கவேண்டியது, AIS (Automatic Information System) கருவிகள். அனைத்து விசைப்படகுகளிலும் AIS கருவிகள் இருக்கவேண்டுமென்று கட்டாயப்படுத்தவேண்டும். அவற்றை இலவசமாக அரசு மீனவர்களுக்கு கொடுக்கவேண்டும். அதுபோல், வானிலை சார்ந்த ஆய்வுகள் மற்றும் வானிலைக்கான தொலைதொடர்பு சாதங்களையும் நவீனப்படுத்தவேண்டும்.

உலகின் மொத்த மீன் அறுவடையில் 86% வளர்ச்சியடைந்த நாடுகளான சைனா, தைவான், ஜப்பான், தென்கொரியா மற்றும் ஸ்பென் என்னும் ஐந்து நாடுகளின் பங்கு. இவர்கள் சர்வதேச கடல் எல்லையில் மட்டுமல்ல, ஏழைநாடுகளின் பிரத்யேக பொருளாதார மண்டலத்திற்குள் (Exclusive Economic Zone) அதிகளவு மீன்பிடித்தத்தில் ஈடுபடுகின்றார்கள். கடந்த சில வருடங்களாக இந்தியா வெளிநாட்டுக் கப்பல்கள் இந்திய எல்லைக்குள் மீன்பிடிப்பதை தடைசெய்திருக்கின்றது என்பது பாராட்டிற்குரியது.

2050ம் வருடம் உலக மக்கள்தொகை ஆயிரம் கோடிகளாக இருக்குமென்று கணிக்கப்பட்டுள்ளது. வெளிநாட்டு கப்பல்கள் அளவுக்கதிகமாக மீன்பிடிப்பதன் காரணமாக, அந்த காலகட்டத்தில் சுமார் 85கோடி மக்களுக்கு ஊட்டச்சத்து குறைபாடு ஏற்படுவதற்கான வாய்ப்புகள் இருப்பதாக சமீபத்திய ஆய்வு சொல்கின்றது. வெளிநாட்டுக் கப்பல்களுக்கு இந்தியா அரசு அனுமதி கொடுக்காமல் இருக்கும்வரை நமக்கு பாதிப்பில்லை என்று நம்பலாம். 

ஆனால், ஜப்பான் நாட்டு நிறுவங்கள் ஆழ்கடல் மீன்பிடிப்பில் தமிழகத்தில் முதலீடு செய்யவிருப்பதாகவும், அவர்களை ஜனவரியில் நடக்கும் முதலீட்டாளர்கள் மாநாட்டிற்கு அழைத்திருப்பதாகவும் தமிழக மீன்வளத்துறை அமைச்சர் கூறியிருக்கின்றார். வெளிநாட்டு நிறுவனங்களுக்கு கடல்சார்ந்த செயல்பாடுகளுக்கு அனுமதியளிப்பது, ஒட்டுமொத்த இந்திய மக்களுக்கும் நல்லதல்ல. ஆழ்கடல் மீன்பிடிப்பில் நம்நாட்டு மீனவர்களை ஊக்கப்படுத்தவேண்டும்.

அரபிக்கடலில், தரமான சுண்ணாம்பு சேறு மற்றும் கட்டுமானத்திற்கு தேவையான கடல்மணல் பெருமளவில் இந்திய பிரத்யேக பொருளாதார மண்டல கடல் எல்லைக்குள் இருப்பதாக கண்டறியப்பட்டுள்ளது. இவற்றை அகழ்ந்தெடுக்க ஒருபோதும் அனுமதிக்கக்கூடாது. இவற்றை அகழ்ந்தெடுப்பனால் ஏற்படும் விளைவுகள் இன்னும் ஆராயப்படவில்லை. கடற்கரைகளில் மணல் அகழ்வதினால், கிராமங்கள் கடலில் மூழ்குவதை கண்கூடாகப் பார்த்துகொண்டிருக்கின்றோம். கடலில் சுண்ணாம்பு மற்றும் கடல்மணலை அகழ்வது கடல்சூழியலுக்கு மிகுந்த சவாலாக இருக்கும்.

அதுபோல், வணிகக்கப்பல்களின் போக்குவரத்தை விரிவுபடுத்துவதற்காக, கடற்கரையிலிருந்து 15 முதல் 40 நாட்டிகல்மைல்கள் வரை அரபிக்கடலில் புதிய வழித்தடம் ஏற்படுத்தபடவிருப்பதாக சொல்லப்படுகின்றது. இந்த வழித்தடத்தை எந்த ஆய்வை அடிப்படையாக வைத்து தீர்மானித்திருக்கின்றார்கள் என்று தெரியவில்லை. 15முதல் 40 நாட்டில் மைல்கள் வரையிலான கடற்பரப்பில்தான், பாரம்பரிய கரைக்கடல் மீனவர்கள் மீன்பிடிக்கின்றார்கள். இந்த புதிய வழித்தடம், கரைக்கடல் பாரம்பரிய மீனவர்களின் வாழ்வாதாரத்தை ஒட்டுமொத்தமாக அழித்துவிடும். அதுபோல், நம்நாட்டில், கப்பல்கள் மீனவர்களின் படகுகளை மோதிவிட்டு-ஓடுவது (hit and run) சமீபகாலமாக அதிகரித்திருக்கின்றது. அதற்கான தீர்வுகள் இன்னும் மேற்கொள்ளப்படவில்லை. இந்த புதிய கப்பல் வழித்தடம் மீனவர்களின் உயிருக்கும் உடமைக்கும் எமனாகவே இருக்கும்.

References:

  1. http://advances.sciencemag.org/content/4/8/eaau2161
  2. https://cosmosmagazine.com/biology/five-nations-take-the-lion-s-share-of-the-world-s-fish
  3. https://www.newsdeeply.com/oceans/articles/2018/08/03/rich-and-poor-divide-which-nations-benefit-from-global-fishing
  4. https://www.nature.com/news/nutrition-fall-in-fish-catch-threatens-human-health-1.20074
  5. https://timesofindia.indiatimes.com/city/kolkata/geologists-strike-seabed-gold-in-peninsular-india/articleshow/59624483.cms
  6. https://timesofindia.indiatimes.com/business/india-business/gsi-unearths-import-quality-lime-mud-marine-sand/articleshow/65522441.cms
  7. https://timesofindia.indiatimes.com/city/madurai/fishers-protest-against-proposed-new-shipping-corridor/articleshow/66407102.cms
  8. https://www.deccanchronicle.com/nation/current-affairs/210918/kollam-shipping-corridor-to-hit-livelihood-of-fishers.html

ஒக்கி புயலும் நோக்கா செயலும்

*ஒக்கி புயலும் நோக்கா செயலும்*

குறும்பனை பெர்லினும், நானும் (கிறிஸ்டோபர் ஆன்றணி) எழுதிய “ஒக்கி புயலும் நோக்கா செயலும்” என்னும் கட்டுரை புத்தம், ஒக்கி புயலினால் பாதிக்கப்பட்ட மக்கள் முன்னிலையில், திருவனந்தபுரம் பேராயர் டாக்டர் சூசைபாக்கியம் அவர்களால் வள்ளவிளையில் வைத்து 01/09/2018 சனிக்கிழமை வெளியிடப்பட்டது.

இது ஒக்கி புயல் சார்ந்த அனைத்து தரவுகளின் தொகுப்பு. இதில் எங்கள் இருவரின் கட்டுரையுடன் மனித உரிமை செயல்பாட்டாளர்கள் திரு. ஹென்றி டிஃபேன் மற்றும் பேராசிரியர் அ.மார்க்ஸ் ஆகியோரின் ஒக்கி புயல் அறிக்கைகளும் இணைக்கப்பட்டுள்ளன. இத்துடன், அரசாங்கத்தின் மனிதாபிமானம் சார்ந்த செயல்பாடுகளும், அரசு ஆணைகளும் இணைக்கப்பட்டுள்ளன. இந்த புத்தகத்தின் முக்கிய குறிக்கோள், ஒக்கி புயல் சார்ந்த அனைத்தையும் ஆவணப்படுத்துவது. இதுவரை கடற்கரை சார்ந்த எந்தவிதமான பேரிடர்களும் ஆவணப்படுத்தப்படவில்லை. குறிப்பாக சுனாமி தடம் தெரியாமல் சென்றுவிட்டது. நாளைய தலைமுறைக்கு சுனாமி குறித்து சொல்வதற்கு நம்மிடம் எந்தவிதமான ஆவணங்களும் இல்லை. வருங்காலத்திலும் சுனாமி காலகட்டத்தில் செய்த தவறை நாம் செய்யக்கூடாது. அதன் முதல் முயற்ச்சியே, “ஒக்கி புயலும் நோக்கா செயலும்” ஆவணப்புத்தகம். அரசு சார்பில் வெளியிடப்படும் ஒக்கி சார்ந்த புதிய அரசாணைகளும் முக்கிய அறிக்கைகளும் அடுத்த பதிப்புகளில் இணைக்கப்படும்.

ஒக்கி பேரிடர் நடந்து முடிந்து ஒன்பது மாதங்கள் முடிவடைந்துவிட்டது. ஒக்கியின் ரணம் இன்னும் தீரவில்லை. ஒக்கியின் ஓலம், திவ்யபாரதியின் “ஒருத்தரும் வரேல”, அருள் எழிலனின் “பெருங்கடல் வேட்டத்து” போன்ற ஆவண்ப்படங்கள் வாயிலாக நம் காதுகளில் ஒலித்துக்கொண்டேயிருக்கின்றது. அரசு சார்பில் பாதிக்கப்பட்ட மக்களுக்கு வழங்கப்பட்ட பொருளியல் உதவி பெருமதிப்புமிக்கது. ஒருமாதகாலத்திற்குள் கடலில் காணமல்போன மீனவர்களை இறந்தவர்களாக அறிவித்தது அரசாங்கத்தின் மனிதாபிமான உச்சம் எனலாம். மத்தியமாநில அரசுகள் பாராட்டிற்குரியவை. ஆனால், கடலில் காணாமல் போன மீன்வர்களை விரைவாக தேடுவதற்காக நடத்தப்பட்ட போராட்டங்களில் ஈடுபட்ட மீனவர்களின் அனைத்து வழக்குகளும் நீக்கப்படுமென்று தமிழக மீன்வளத்துறை அமைச்சர் திரு. ஜெயகுமார் அவர்கள் வாக்குறுதியளித்தபின்னரும், மீனவர்களை கோர்ட்டு கேஸ் என்று அலைக்களிப்பதில் எந்தவிதமான நியாயவுமில்லை.

ஒக்கி புயல் சார்ந்த அரசு அறிக்கைகளில் முக்கியமானது, முன்னாள் மத்திய அமைச்சர் பா. சிதம்பரம் தலைமையிலான பாராளுமன்ற நிலக்குழுவின் அறிக்கை. ஏப்ரல் 4, 2018ம் நாள் ஒக்கி புயல் மீனவர்களுக்கு ஏற்படுத்திய பாதிப்பு குறித்த அறிக்கை ராஜ்யசபாவில் வெளியானது. அதில் சொல்லப்படும் முக்கிய பரிந்துரைகள்:

  1. இந்திய வானிலை ஆய்வு மையம் சொல்வதுபோல், விரைவாக உக்கிரம் கொள்ளும் சூறாவளிகள் அரிய நிகழ்வல்ல. பல நாடுகள் ஒக்கி போன்ற சூறாவளிகளை தகுந்த நேரத்தில் கணிக்கும் தொழில்நுட்பத்தை பெற்றிருக்கின்றன. விரைவாக உக்கிரம் கொள்ளும் சூறாவளிகளை கணிப்பதற்கான ஆய்வுகளை மேற்கொள்ளவேண்டும். இந்த தொழில்நுட்பம் இருக்கும் நாடுகளின் உதவியையும் பெறவேண்டும்.
  2. இந்திய வானிலை மையம், வானிலையை கணிக்க வளிமண்டல மாதிரிகளை (atmospheric models) மட்டுமே பயன்படுத்துகின்றது. கடல் மாதிரிகளை (oceanic models) பயன்படுத்தும் தொழில்நுட்பம் நம்மிடம் இல்லை. ஒக்கி புயல் கடல் மாதிரிகளை பயன்படுத்தாத காரணத்தினால், நம்மால் ஒக்கிபுயலை கணிக்கமுடியவில்லை. எனவே, கடல் மாதிரிகளை பயன்படுத்துவதற்கான தொழில்நுட்பத்தை விரைவாக ஏற்படுத்தவேண்டும். வெளிநாடுகளின் உதவியுடன், அதற்கான ஆய்வுகளை விரைந்து நடத்தவேண்டும். [2016ம் வருடத்திலிருந்தே, வானிலை ஆய்வில் கடல் மாதிரிகள் பயன்படுத்தப்படுமென்று சொல்லிக்கொண்டேயிருக்கின்றார்கள் என்பதும் அதை செயல்படுத்தாமல் இருப்பதும் வருத்தமான விஷயம்.]
  3. கடல் சீதோஷண நிலையை தெர்மல் செயற்கைக்கோள்களின் உதவியுடன் பெற்று அதை சூறாவளி   முன்கணிப்பு மாதிரிகளுடன் இணைக்கவேண்டும்.
  4. புவி வெப்பமயமாதல் காரணமாக, கடல்நீர் வெப்பநிலையும் அதிகரிக்கின்றது. எனவே, ஒக்கி போன்ற சூறாவளிகளின் பாதையையும் வீரியத்தையும் கணிப்பது கடினமானது. எனவே, கணிக்கமுடியாத சூறாவளிக்களுக்கு பொதுவான இயக்க நடைமுறையை (Standard Operating Procedure) உலக நாடுகளுடன் செயல்படுத்தவேண்டும். 
  1. INSAT 5B செயற்கைகோளின் உதவியுடன் செயல்படும், படகுகளில் பயன்படுத்தப்படும் கப்பல் கண்காணிப்பு யூசர் டெர்மினல்களையும், மைய கண்காணிப்பு அமைப்பையும் கூடிய விரைவில் இஸ்ரோவின் உதவியுடன் செயல்படுத்தவேண்டும். மேற்சொன்ன Vessel Tracking System அனைத்து ஆழ்கடல் விசைப்படகுகளிலும் கண்டிப்பாக இருக்கும்படிசெய்யவேண்டும். மற்றபடகுகளில் VHF மற்றும் DAT ஆகியவையும் இருக்கவேண்டும். இவற்றை சலுகை விலையில் கொடுக்கவேண்டும்.
  2. இஸ்ரோ உருவாக்கிக்கொண்டிருக்கும் FishermanApp அடுத்த ஆறுமாத காலத்தில் அனைத்து மீனவர்களின் செல்பேசிகளிலும் இருக்கும்படி செய்யவேண்டும். FishermanApp தரவிறக்கம் செய்யப்பட்ட செல்பேசிகளில் செயற்கைகோள் மூலமாக தகவலகளை பரப்பமுடியும்.
  3. மீனவர்களின் இழப்பும், காலம் பிந்திய தேடுதல் நடவடிக்கையும் வருத்தத்திற்குரியது. தேடுதல் நடவடிக்கை முடிவடையும் போது, 244 மீனவர்கள் இன்னும் காணாமலாகியிருக்கின்றார்கள். அவர்களின் குடுபங்களுக்கு வாழ்வாதார நிவாரணம் மிக விரைவாக கிடைக்கும்படி செய்யவேண்டும். [மாநில அரசு சார்பில் இறந்த/காணாமல் போன மீனவர்களின் குடும்பங்களுக்கு 20 லட்சம் ரூபாய் தகுந்த நேரத்தில் கொடுக்கப்பட்டது.]
  4. மத்திய அரசு சார்பில், இறந்தவர்களுக்கு 5 லட்சம் ரூபாயும், காயமடைந்தவர்களுக்கு 1 லட்சம் ரூபாயும் கொடுக்கப்படவேண்டும். பாதிக்கப்பட்ட மீனவர்களின் மறுவாழ்விற்கு மாநில அரசுகள் சிறப்பு உதவிகளை விரைவாக செய்யவேண்டும்.
  5. புயலில் உயிரிழந்த/காணாமல் போன மீனவர்களின் குழந்தைகளுக்கு இலவசமாக கல்வியை அளிக்கவேண்டும். குடுபத்தில் ஒருவருக்கு மறுவாழ்விற்கான பயிற்சியை அளிக்கவேண்டும்.

இவற்றில் தொழில் நுட்பம் சார்ந்து எந்தவித முன்னேற்றமும் இருப்பதாகத் தெரியவில்லை. மாநில அரசுகள் உறுதியளித்ததுபோல், பொருளியல் உதவிகளை செய்திருக்கின்றது. ஆனால், மத்திய அரசு நிலைக்குழு பரிந்துரைத்த பொருளியல் உதவியை செய்ததாகத்தெரியவில்லை. பொருளியல் உதவிக்கு மேலாக வானிலை முன்கணிப்பிற்கான தொழில் நுட்ப முன்னேற்றமே நமக்கு தேவையானது. அல்லாத பட்சத்தில் ஒக்கி போன்ற பேரிடர்கள் தவிர்க்க முடியாததாகவே இருக்கும்.

“ஒக்கி புயலும் நோக்கா செயலும்” கட்டுரை புத்தகத்தை வெளியிட்ட மதிப்பிற்குரிய திருவனந்தபுரம் பேராயர் டாக்டர் சூசைபாக்கியம் அவர்களுக்கும் வள்ளவிளை பங்குத்தந்தை பாதர் டார்வின் பீட்டர் மற்றும் பங்குப்பேரவை உறுப்பினர்கள் அனைவருக்கும் நன்றி. புத்தகத்தை ஒக்கி புயல் நிவாரண நிகழ்வில் வெளியிட உதவிய நண்பர்கள் திலீப் மற்றும் ஆல்பர்ட் ஆகியோருக்கும், சேலாளி பதிப்பகத்தாருக்கும் மனமார்ந்த நன்றி. 

Click to access The%20Cyclone%20Ockhi.pdf

Click to access LSQ.4065.pdf

கிமு. கிபி.

தமிழக புதிய தமிழ் பாடப்புத்தங்களில் கிமு கிபி என்ற வார்த்தை குறித்து சில விவாதங்களை சமீபத்தில் படிக்க நேர்ந்தது. கிறிஸ்துவுக்கு முன் / பின் என்பதை மாற்றி பொது ஆண்டிற்கு முன் / பின் என்று பயன்படுத்த உலக கல்வி நிறுவனங்கள் முழுமனதாக தீர்மானித்திருப்பதாக பொய்ப்பிரச்சாரமும் செய்யப்படுகின்றது. அனைத்து கல்வி நிறுவனங்களுக்கும் பொதுவான கொள்கை முடிவுகளை உருவாகும்  உலகளாவிய கல்வி நிறுவனங்களுக்கான அமைப்புகள் எதுவுமில்லை. அமெரிக்கா உட்பட பல நாடுகளிலும் கூட கொள்கை முடிவுகளை அந்தந்த கல்லூரிகளும் பல்கலைக்கழகங்களும் மாவட்ட நிர்வாகவுமே எடுக்கின்றது.

தமிழக பாடநூல்களில் செய்யப்பட்டிருக்கும் மாற்றங்கள் என்னவென்பதை புரிந்துகொள்ள புதிய  பதினொன்றாம் வகுப்பு தமிழ் மின்னூல் புத்தகத்தை புரட்டிப்பார்த்தேன். ஓரிடத்தில் மட்டும் “பொ.ஆ.மு. 6-ம் நூற்றாண்டு: பித்தகோரஸ்தான் முதலில் மனம் மூளையில் இருக்கின்றதென்றார்.” என்று பொ.ஆ.மு.  குறிப்பிடப்பட்டுள்ளது. பொ.ஆ.மு. என்றால் பொது ஆண்டுக்கு முன் என்று நினைக்கின்றேன். பொது ஆண்டு என்றால் கிறிஸ்து பிறந்த ஆண்டு. எனவே, பொ.ஆ.மு என்பதற்கும் கி.மு என்பதற்கும் எந்தவிதமான வேறுபாடுமில்லை. மீதி இடங்களில் வருடங்கள் முன்னொட்டு இல்லாமல் இருக்கின்றது. உண்மையாகச்சொன்னால், இதையே ராராசோமு / ராராசோபி (ராஜராஜ சோழனுக்கு முன்னும் பின்னும்) என்று மாற்றியிருந்தாலாவது ஏதாவது அர்த்தமிருக்கும்.

கிமு மற்றும் கிபி என்பதை பொ.ஆ.மு மற்றும் பொ.ஆ.பி என்று, வேற்று மத மக்களின் நம்பிக்கைக்கு மதிப்பளித்து, மாற்றவேண்டுமென்பதை 2017ம் வருடம் இங்கிலாந்தின் மதக்கல்விகளுக்கான அமைப்பு  (SACRE) முதன்முதலில் முன்மொழிந்தது. இங்கிலாந்து கிறிஸ்தவ பெரும்பான்மை நாடென்பதால் கிமு/கிபி என்று புத்தகங்களில் இருப்பதை எதிர்மறையாகப் பார்க்கின்றீர்களா என்று சிறுபான்மை மதத்தவரிடம் கேட்கப்பட்டது.  ஆனால், கிமு கிபி என்றிருப்பது எங்களுக்கு எந்தவிதத்திலும் புண்படுத்தவில்லையென்று முஸ்லிம் மற்றும் யூத மதத்தலைவர்கள் சொன்னார்கள். வேறு எந்த நாட்டிலும்  பொ.ஆ.மு/பி என்று திட்டவட்டமாக பின்பற்றப்படவுமில்லை. எனவே, கிமு. கிபி என்பதை பொ.ஆ.மு./பொ.ஆ.பி என்று மாற்றவேண்டுமா என்பதை தனிப்பட்ட பள்ளிகள் முடிவு செய்யலாம் என்று SACRE அமைப்பு சொல்லிவிட்டது. எனவே, தமிழக பாடபுத்தகத்தில் மட்டும் கிமு. கிபி என்பதை மாற்றுவது அடிப்படை நேர்மையில்லாதது.

இன்றைய உலகமயமாதல் காலகட்டத்தில் கி.மு. கி.பி என்றிருப்பதற்கு பதில், பொதுவான முறையில் வருடங்களை குறிப்பிடுவதுதான் சரியானதாக இருக்கும். ஆனால், அதை நடைமுறைப்படுத்திய விதம் சரியானதல்ல. இதை நடைமுறைப்படுத்திய கல்வி குழுவும் முற்று முழுதான அதிகாரம் கொண்டதுமல்ல. எனவே இந்த மாற்றம், மதம் தாண்டிய கல்வியாளர்களின் விவாதத்திற்குரியது. இந்த மாற்றத்தில் தொடர்புடைய மக்களின் / மாணவர்களின் / கல்வியாளர்களின் கருத்தை கேட்கும் கடமை அரசிற்கு இருக்கின்றது.

இந்த புத்தகத்தை புரிட்டியபோது எனக்குக் கிடைத்த அனுபவம் வேறுவிதமானது. இதில் சித்தர்கள், வில்லிபாரதம், சீறாப்புராணம் என்று மதம் சார்ந்த பாடங்கள் இருக்கின்றது. ஆனால், இந்தியாவில் சுமார் 1900 வருடங்களுக்கும் மேலாக இருக்கும் கிறிஸ்தவம் குறித்து எதுவுமில்லை. அதுபோல், அனைத்து திணைகளும் சொல்லப்பட்டிருக்கின்றது. நெய்தல் திணைகுறித்து எதுவுமில்லை. காடு, நாடு, மாடு, புலம்பெயர் உலகு என்று பலதரப்பட்ட வாழ்வியல் குறித்தும் சொல்லப்பட்டுள்ளது. ஆனால், நெய்தல் மக்களின் வாழ்வியல் குறித்து எதுவுமில்லை. புத்தக வடிவமைப்பாளர்கள் இவையெல்லாம் தேவையில்லையென்று நினைத்திருக்கலாம். அல்லது பன்னிரெண்டாம் வகுப்பு தமிழ் பாடத்தில் உட்படுத்தலாமென்று முடிவெடுத்திருக்காம். பன்னிரெண்டாம் வகுப்பு புத்தகம் வரும்வரை காத்திருக்கவேண்டும்.

இந்த மின்நூல் புத்தகத்தின் ஆறாம் பக்கதில் “சீண்டாமை மனித நேயமற்ற செயலும் பெருங்குற்றமும் ஆகும்” என்றிருக்கின்றது. அதையாவது அச்சுப்புத்தகத்தில் சரியாக அச்சிட்டால் வாழ்த்தலாம்.

 

http://www.tnscert.org/tnscert/ebooks/

https://www.telegraph.co.uk/news/2017/10/01/bce-not-bce-common-era-bc-ad-appears/

கடலோர மண்டல மேலாண்மை வரைவு

கன்னியாகுமரியில் பன்னாட்டு பெட்டகமாற்று துறைமுகம் கொண்டுவருவதற்கு ஏதுவாக கவனவமாக கடற்கரை சார்ந்த சட்டதிட்டங்களில் மாற்றங்கள் கொண்டுவரப்படுகின்றது. ஏற்கெனவே “முக்கிய துறைமுகங்கள் பொறுப்பு நிறுவனச் சட்டம் – 1963” என்னும் சட்டத்தை மாற்றி “பிரதான துறைமுகங்கள் அதிகாரசபை மசோதா, 2016” என்று மத்திய அரசால் கொண்டுவரப்பட்டுள்ளது. இதுகுறித்து “இனயம் துறைமுகம்” புத்தகத்தில் விரிவாக உள்ளது.

விழிஞ்சம் பன்னாட்டு துறைமுகத்திற்கு சாதகமாக கடலோர ஒழுங்குமுறை சட்டத்தில் (CRZ) திருத்தம் மேற்கொள்ளப்பட்டது.

தற்போது, தமிழக கடலோர மண்டல மேலாண்மை திட்டத்தில் திருத்தம் கொண்டுவரப்பட்டுள்ளது. இதற்கான வரைவு தமிழக சூழியல்துறை வலைத்தளத்தில் வெளியாகியுள்ளது. 45 நாட்களுக்குள் (ஏப்ரல் 6, 2018) இந்த வரைவில் தவறுகள் மற்றும் அறிவுரைகளை அரசாங்கத்திற்கு தெரியப்படுத்தவேண்டும். அதனடிப்படையில் இந்த வரைவு சட்டமாக மாற்றப்படும்.

நடைமுறையிலிருக்கும் கன்னியாகுமரி மாவட்டத்தின் கடலோர வரைபடத்தையும், புதிய வரைபடத்தையும் ஒப்பிடும்போது, இந்த புதிய வரைவு கடற்கரையை திட்டமிட்டு அழிப்பதற்கு கொண்டுவரப்படுவதாகவே தோன்றுகின்றது. முக்கியமான விடுபடல்கள்:

1. CRZ படிநிலைகள் தெளிவாக இல்லை. கடற்கரையில் புதிய கட்டுமான திட்டங்களை CRZ படிநிலைகளே தீர்மானிக்கின்றது.
2. பாதுகாக்கப்பட்ட (protected zone) கடற்கரைகள் புதிய வரைவில் தெளிவில்லை.
3. ஆமைகள் குஞ்சுபொரிக்கும் இடங்கள் விடுபட்டுள்ளது.
4. நடைமுறையிலிருக்கும் வரைபடத்தில் தூத்தூர் மற்றும் மணவாளக்குறிச்சி பகுதிகள் கனிம மணற்பகுதியாக குறிப்பிடப்பட்டுள்ளது. புதிய வரைவில் கனிமமணல் குறித்து எதுவுமில்லை.

கடற்கரை அமைப்புகளும், தனிமனிதர்களும் இந்த புதிய வரைவை மிகக் கவனமாக அலசி ஆராயவேண்டியுள்ளது. அல்லது, காடுகளும் மலைகளும் ஆதிவாசி மக்களிடமிருந்து கைப்பற்றப்பட்டு பெருமுதலாளிகளில் கைகளுக்குச் சென்றதுபோல், கடற்கரைகள் மீனவர்களின் கைகளிலிருந்து திட்டமிட்டு பிடுங்கப்பட்டு பெருமுதலாளிகளின் கைகளுக்குச்செல்லும். அடுத்து வரும் 45 நாட்களும் மீனவர்களின் வாழ்வியலின் மிக முக்கியமான நாட்கள்.

புதிய வரைவு: http://www.environment.tn.nic.in/draftczmp.html

ஒக்ஹி – ஒரு தேசிய பேரிடர் – 3

இதுவரை 6 வள்ளவிளை விசைப்படகுகள் கடலில் மூழ்கியதாக சொல்லப்படுகிறாது. இதில் 90 ஆட்கள் வேலைக்குச் சென்றிருந்தார்கள். எத்தனைபேர் நீந்தி தீவுகளில் கரையேறினார்கள் என்பதோ, எத்தனைபேர் காப்பாற்றப்பட்டார்கள் என்பதோ இன்னும் தெரியவில்லை. அனைத்து ஊர்களில் ஏற்பட்டிருக்கும் உயிரிழப்புகள் 200 முதல் 500 வரை இருக்கலாம்.

அரசுகள் சொல்லும் உயிரிழப்புகளை கணக்கில் கொள்ளக்கூடாது. உண்மையான உயிரிழப்புகளை அறியவேண்டுமென்றால் ஒன்று மீனவர்கள் சொல்வதை கேட்கவேண்டும். அவர்களிடம் இறந்தவர்கள் குறித்த அனைத்து தகவலும் இருக்கிறது. இன்னொன்று,நேர்மையான நீதிபதிகளைக் கொண்டு ஒரு விசாரணைக் கமிஷன் அமைக்கவேண்டும்.

12 மணி நேரத்திற்கு முன்னர் மட்டுமே மீனவர்களுக்கு வானிலை முன்னறிவிப்பு கொடுக்கப்பட்டது. ஆழ்கடலில் மீன்பிடிக்கும் விசைப்படகுகள் கரைக்கு வருவதற்கு குறைந்தது 5 நாட்களாவது ஆகும். கரைக்கடலில் படகு கவிழ்ந்து நீச்சலடித்துக்கிடந்தவர்கள், கடவுளின் கருணையைத்தவிர, உயிர்பிழைப்பதற்கான வாய்ப்புகள் இல்லை. இன்னும் ஆழ்கடலில் தேடுதலை நடத்தவேண்டும். கொடுமையான உறைபனி கடல் நீரில் நீந்தி ஒரு இரவைக் கடப்பதென்பது இயலாத காரியம்.

நீங்கள் ஓட்டு எண்ணுவதைப்போல் நாங்கள் பிணங்களை எண்ணிக்கொண்டிருக்கிறோம். ஒவ்வொருவரும் தங்கள் கைகளில் தங்கள் தந்தைமார்கள், மகன்கள், சகோதரர்கள், கணவர்கள் தொழிலுக்குச் சென்ற விசைப்படகுகளின் விவரங்களையும் அலைபேசி எண்களையும் கையில் வைத்துக்கொண்டு, தேர்வு முடிவுகளை அறிய விரும்பும் மாணவர்களைப் போல், அலைந்துகொண்டிருக்கின்றார்கள்.

தகுந்த நேரத்தில் முன்னெச்சரிக்கை செய்யாத, விரைவாக தேடுதல் முயற்சியில் ஈடுபடாத, மத்திய மாநில அரசுகள் உயிரிழப்பிற்கு பொறுப்பேற்கவேண்டும். கடைசி குடிமகனுக்கு பயன்படாத தொழில் நுட்பவளர்ச்சியை வைத்துக்கொண்டு, நீங்கள் ஒரு ராக்கெட்டில் ஆயிரம் செயற்கை கோள்களை விண்ணில் ஏவினாலும் பலனில்லை. இந்தியா, அதன் விஞ்ஞான, பாதுகாப்பு, பேரிடர் மேலாண்மை கட்டுமானத்தை அடிப்படையிலிருந்தே துவங்கவேண்டும்.

மீனவர்களின் உயிர்கள் விலைமதிப்பற்றவை. அரசு சொல்லும் 4லட்சம் 10லட்சம் என்பவை மீனவர்களை கேவலப்படுத்தும் செயல். மீனவர்களின் உயிருக்கு குறைந்தபட்ச மதிப்பையாவது கொடுங்கள். மீனவர்களை காப்பாற்றுவதற்கான முயற்சியை இன்னும் துரிதப்படுத்தவேண்டும். கடைசி உயிர் கிடைக்கும்வரையல்ல, கடைசி பிணம் கரையேறும்வரை தேடுதலை நடத்தவேண்டும்.

ஒக்ஹி – ஒரு தேசிய பேரிடர் – 2

டிசம்பர் ஒன்றாம் நாள் அமெரிக்காவின் நாசா ஒகி புயல் குறித்த சில தகவல்களை வெளியிட்டது. தற்போது நம்முடைய மீனவர்கள் பாதிப்பிற்குள்ளான புயல் பகுதியை அமெரிக்காவின் அகுவா மற்றும் சுவோமி செயற்கைக்கோள்கள் கடந்துசென்றபோது மேகமூட்டத்தின் குளர் அளவு -63 டிகிரி பாரன்ஹீட் (-53 டிகிரி செல்சியஸ்). இந்த மேகங்கள் மழையாக கடலில் விழும்போது, குறைந்தபட்சம் குளிர் அளவு உறைநிலைக்கும் குறிவாகவே இருக்கும். இதை மீனவர்களும் உறுதிப்படுத்தியிருக்கின்றார்கள்.

இதன் காரணமாக படகுகள் சேதமாகி, கடலில் விழுந்த பல மீனவர்கள் இறந்திருக்கின்றார்கள். முக்கியமாக சிறுவர்களும் இளைஞர்களும், இதுவரை நமக்கு தெரிந்தது 14-20 வரையில்லானவர்கள் இறந்திருக்கின்றார்கள். இதில் பள்ளிப்படிப்பையும் கல்லூரி படிப்பையும் முடித்தவர்கள். குடும்ப சூழ்நிலை காரணமாக கடலுக்குச் சென்றவர்கள். உறைநிலை குளிரை பெரியவர்களால் கூட எதிர்கொள்ளமுடியாது. இந்த உறை குளிரையும் தாக்குப்பிடித்து பல மீனவர்கள் தப்பியிருக்கின்றார்கள்.

மீனவர்களுக்கு புயல் குறித்த தகவல் தெரிந்தது அக்டோபர் 29-ம் தியதிக்குப் பிறகுதான். தகவலறிந்ததும் யாரும் தொழிலுக்குச் செல்லவில்லை. கடலில் புயலால் பாதிப்படைந்தவர்கள் புயல் குறித்த தகவல் தெரியாதவர்கள். தொழில்நுட்பம் வளர்ந்த காலத்திலும் கூட, புயல் வந்தபிறகுதான் தகவல் மற்றும் மென்பொருள் தொழில்நுட்பத்தில் வளர்ச்சியடைந்த நாட்டின் அமைப்புகளால் மீனவர்களுக்கு தெரியப்படுத்த முடியுமென்றால் உங்களை மனிதர்களாக கணக்கிலெடுக்கமுடியாது. ஒவ்வொரு நாடும், குறைந்த பட்சம் ஒருவாரத்திற்கான எதிர்வரும் வானிலையை துல்லியமாக கணித்து வெளியிடுகின்றது. இந்தியாவால் ஒரு நாள் முன்கூட்டியே வானிலையை கணிக்க முடியவில்லை. எங்கோ தவறிருக்கின்றது. அமெரிக்காவின் செயற்கைக்கோள்கள் ஒகி புயலை கடந்துசென்றது பதிவாகியிருக்கிறது. இந்தியாவின் எத்தனை செயற்கைக்கோள்கள் ஒகி புயல் குறித்த தகவலை வெளியிட்டிருக்கிறது? இந்தியா அனுப்பும் செயற்க்கைக்கோள்கள் யாருக்கு? யாருடைய லாபத்திற்கு?

மீட்புப்பணிகள் டிசம்பம் ஒன்றாம் தியதிக்குப்பிற்குதான் துவங்கியது. நவம்பர் 30-ம் தேதி ஏற்பட்ட உயிரிழப்பிற்கு யார் பொறுப்பேற்பது? ஆழ்கடலில் ஏராளம் பிணங்கள் மிதந்ததை தாங்கள் கண்தாக மீனவர்கள் சொல்கிறார்கள். படகு கவிழ்ந்து நீச்சலடித்து வந்த மூன்று வள்ளவிளை மீனவர்கள் இறந்துவிட்டார்கள். வள்ளவிளையில் இதுவரை 8, இரவிபுத்தன்துறையில் 6, நீரோடியில் 12 என்று உறுதிப்படுத்தப்பட்டுள்ளது. மொத்த இறப்பு எண்ணிக்கை இன்னும் தெரியவில்லை.

இப்போதைய கணக்குப்படி (5/12/2017 மாலை 8:00 மணி) வள்ளவிளை கிராமத்தில் மட்டும் 37 விசைப்படகுகள் குறித்த தகவலில்லை. 500 மீனவர்களுக்கும் அதிகம். இந்திய கடற்படை கப்பல்கள் 60 நாட்டிகல் மைல்களுக்குள்ளாகவே தற்போது தேடுதல் நடத்துவதாக புகார்கள் எழுகின்றது. 60 நாட்டிகல் மைல்களுக்குள் இந்த விசைப்படகுகள் இல்லை. 100 நாட்டிகல் மைல்களுக்கு அப்பால் தேடவேண்டும். அரசு நிர்வாகத்திடம் விசைப்படகுகளின் மிகத்துல்லியமான ஜிபிஎஸ் புள்ளிகள் கொடுக்கப்பட்டுள்ளது. ஆனால், அந்த இடங்களிலிருந்து தாங்களாகவே மீண்டுவரும் மீனவர்கள், இந்தியாவின் கப்பல்களோ, விமானங்களோ அந்த பகுதியில் இதுவரை செல்லவில்லையென்று சொல்கின்றார்கள். கப்பல்களும் விமானங்களும் எங்கே தேடுதல் நடத்துகின்றது?

மீனவர்களும் தேடுதலில் ஈடுபடலாம் என்னும் கோரிக்கையை அரசு ஏற்றுக்கொண்டது. சில மீனவர்கள் தூத்துக்குடிக்கு சென்றார்கள். ஆனால், தூத்துக்குடியிலிருந்து கன்னியாகுமரை வரைத்தான் தேடமுடிமென்று மீனவர்களிடம் அதிகாரைகள் சொல்லியிருக்கின்றார்கள். நீங்கள் கடலில் எதற்கு தேடவேண்டும், ஊட்டியில் தேடுங்கள். சில ஊட்டிகளாவது கிடைக்கும். கறிவைத்து சாப்பிடுங்கள்.

ஒன்று கவனித்தால் தெரியும். இந்திய கடற்படையும், விமானப்படையும் ஒன்றிரெண்டு மீனவர்களாக தொடர்ந்து மீட்கின்றார்கள். தொடர்ந்து பதிவாகிக்கொண்டே இருக்கின்றது. மீட்புப்படைக்கு நன்றி. ஆனால், தாங்களாகவே கரைசேரும் மீனவர்கள் 200, 600, 900 என்ற கணக்கில் பெருந்தொகையாக வருகின்றார்கள். ஆனால், இவர்கள் அனைவரையும் அரசு மீட்டதாகச் சொல்வது வருத்தத்திற்குரியது.

தற்போது மீனவர்களிடம் படகுகள் இல்லை. அல்லது அவர்களே அவர்களின் நண்பர்களை, உறவினரை தேடச்செல்வார்கள். அரசை கெஞ்சமாட்டார்கள். அந்த பழக்கம் அவர்களுக்கில்லை. இனியும் அரசாங்கத்தை நம்புவதிலும் அர்த்தமில்லை. மீனவர்கள் தங்களுக்கான தொழிநுட்பத்தையும், வளர்ச்சிக்கான திட்டங்களையும், ஒரு இணை அரசாங்கமாக அவர்களே செய்தாலொழிய மீனவர்களுக்கு எதிர்காலமில்லை.

இனயம் துறைமுகம் – ஒரு தகவல்பிழை

இனயம் துறைமுகம்  புத்தகத்திலிருக்கும் ஒரு தகவல்பிழையை நண்பர் N.D. தினகர் சுட்டிக்காட்டியுள்ளார்.

“உங்களது இனயம் துறைமுகம் புத்தகத்தை பார்த்தேன். பக்கம் 125 ல் தவறான தகவல் இருந்ததாலயே இந்த பதிவு.

திருவாங்கூர் சமஸ்தானத்தில் 1948 ல் நடைபெற்ற தேர்தலில் மட்டுமே மீனவருக்கு தனித் தொகுதி தரப்பட்டிருந்தது. அகஸ்தீஸ்வரம் ( கத்தோலிக்கர்) என்பதே அந்த தொகுதியின் பெயர். இதில் பரதவர் சாதியைச் சேர்ந்த அம்புரோஸ் வெற்றிபெற்றார்.
1949 ல் திரு-கொச்சி மாநிலம் உருவான பிறகு 1952 ல் முதல் பொதுத் தேர்தல் நடைபெற்றது.இதில் விளவங்கோடு தொகுதியில் சைமன் வெற்றி பெற்றார். விரைவில் ஆட்சி கவிழ்ந்துவிட்டதால் 1954 ல் மீண்டும் சட்டமன்ற தேர்தல் நடத்தப்பட்டது. இந்த தேர்தலின் போது தொகுதி மறுசீரமைப்பு செய்யப்பட்டு புதிதாக கொல்லங்கோடு தொகுதி உருவாக்கப்பட்டது. இந்த தொகுதியில் போட்டியிட்ட சைமன் வெற்றிபெற்றார்.
சைமன் வெற்றிபெற்ற அந்த 2 தொகுதிகளும் பொதுத் தொகுதிகள் ஆகும். சைமனை எதிர்த்து துரைசாமி போட்டியிட்டதால் அது மீனவர் தொகுதி என்று பின்னாளில் தவறாக புரிந்துகொள்ளப்பட்டது.”
உண்மைதான். கொல்லங்கோடு தொகுதி பொதுத்தொகுதியாகவே இருந்தது. நான் மீனவர்களின் தனித்தொகுதி என்று எழுதியது தகவல்களை சரிபார்ப்பதில் நடந்த பிழை. 1954-ம் வருடம் நடந்த தேர்தல் அறிக்கையை வைத்து சரிபார்த்தேன். அதில் திரு. சைமன் அலெக்ஸாண்டர், அவருக்கு எதிராக போட்டியிட்ட திரு. கொட்டில்பாடு துரைசாமி ஆகியோரின் பெயர்கள் மட்டுமே இருக்கின்றது. எனவே அது மீனவர்களின் தனித்தொகுதி என்று எண்ணவேண்டியிருந்தது. சிறைமீன்கள் அதிகாரத்தில் 1954-ம் வருட தேர்தல் அறிக்கையையே குறிப்பில் சுட்டியிருக்கிறேன். தவறை சுட்டிக்காட்டிய நண்பருக்கு நன்றி.

நேதாஜி விருது

*நேதாஜி விருது*

தூத்தூர் பகுதியின் சாதனையாளர்களை கௌரவிக்கும் விதமாக  நேதாஜி விருதை ‘தூத்தூர் நேதாஜி நூலகம் மற்றும் விளையாட்டுக் குழு’ புதிதாக அறிவித்திருக்கின்றது. மீனவர்களின் நலனில் அக்கறைகொண்டு தொடர்ந்து எழுதுவதற்காக நேதாஜி விருதிற்கு என்னை தேர்வு செய்திருக்கின்றார்கள். நேதாஜி விருதை பெறுவதில் மிக்க மகிழ்ச்சி. தேர்வு செய்த தேர்வுக்குழு உறுப்பினர்களுக்கும், தொடந்து எழுத ஊக்கப்படுத்திய நண்பர்களுக்கும் என் நன்றியை தெரிவித்துக்கொள்கின்றேன்.

நேதாஜி விருத்திற்கான மின்னஞ்சலை  என்னால் நம்ப முடியவில்லை. நண்பரிடம் கேட்டு உறுதிப்படுத்தவேண்டியிருந்தது. காரணம், என்னைவிட சாதனையாளர்கள் அங்கே ஏராளம் இருக்கின்றார்கள். இது தூத்தூர்  பகுதியில் எழுத்தை ஊக்கப்படுத்துவதற்கானது என்பதை அறிந்துகொண்டேன். இதன் வழியாக புதிய எழுத்தாளர்கள் உருவாகட்டும். அவர்களுக்கு என்னுடைய மனமார்ந்த வாழ்த்துக்கள்!

தூத்தூர் நேதாஜி நூலகம் மற்றும் விளையாட்டுக் குழு கால்பந்தாட்டத்தில் தமிழகம் மற்றும் கேரளாவில் புகழ்பெற்ற ஒரு அமைப்பு. கடந்த 25 வருடங்களுக்கும் மேலாக தூத்தூர் கிராமத்தில் ஒருநாள் கால்பந்தாட்டப்போட்டிகளை ஈஸ்டர் தினத்தில் நடத்துகின்றார்கள். இதில் தமிழகம் மற்றும் கேரளா அணிகள் விளையாடும். வெளிநாட்டு வீரர்களும் கலந்துகொள்வதுண்டு. இந்த வருட விழாவில் முதன்மை விருந்தினராக இந்திய அணுசக்திக் கழகத்தின் துணைச் செயலாளர் திரு. மெர்வின் அலெக்சாண்டர் கலந்து கொண்டு விழாவை கௌரவிக்கவிருக்கின்றார். கால்பந்தாட்ட விழா மேடையில்வைத்து நேதாஜி விருது வழங்கப்படும்.

தூத்தூர் கிராமம் கால்பந்தாட்டத்தில் மிகவும் புகழ்பெற்ற ஊர். தற்போது தூத்தூர் பகுதியென்றால், பொழியூர் கொல்லங்கோட்டிலிருந்து, இறையும்மன்துறை வரையிலான இரண்டு பொழிமுகங்களுக்கு இடைப்பட்ட பகுதி. ஏவிஎம் கால்வாயை தூர்வாரினால், தூத்தூர் ஒரு  அழகிய தீவுப்பகுதி. ஆனால், எனக்கு தூத்தூரென்றால் தூத்தூர், சின்னத்துறை மற்றும் இரவிபுத்தன்துறை என்னும் மூன்று ஊர்களும் இணைந்த பகுதி. கடற்கரை கிராமங்களில் கால்பந்து விளையாட்டு மிகவும் பிரசித்தம். கால்பந்தாட்ட குழுக்கள் அந்தந்த ஊரின் முகம்.

ஒவ்வொரு ஊரிலும் கால்பந்தாட்டப் போட்டிகள் நடக்கும். நான் சிறுவனாக இருந்தபோது, தூத்தூர் KRYC (Kennedy Rural Youth Club) கால்பந்தாட்ட அணியை விஞ்ச யாருமில்லை. இறையுமன்துறையிலிருந்து இரவிபுத்தன்துறை வரை ஐந்து ஊர்கள் இணைந்த விளையாட்டுக்குழு. வள்ளவிளையிலும் கொல்லங்கோட்டிலும் சிறந்த குழுக்கள் உண்டு.  தூத்தூரை தோற்கடிக்க வேண்டுமென்றால், கேரளாவிலிருந்து விளையாட்டு வீரர்களை ‘கடனெடுத்து’ வரவேண்டும். KRYCயின் முக்கியமான வீரரான இரவிபுத்தன்துறை திரு.தீர்த்தூஸ் கன்னியாகுமரி மாவட்ட அணிக்கு நீண்டகாலமாக பயிற்சியாளராக இருக்கின்றார். தற்போது KRYC இல்லை. தூரத்தூர் பகுதியின் ஒவ்வொரு ஊருக்கும் தனித்தனி குழுக்கள். தற்போது KRYC-யின் இடத்தை பிடித்திருப்பது தூத்தூர் நேதாஜி நூலகம் மற்றும் விளையாட்டுக் குழு.
தற்போது அரசு நிறுவனக்களின் கால்பந்து வீரர்களாக பல நண்பர்கள் வேலை பார்க்கின்றார்கள். தமிழக கால்பந்தாட்ட அணியில் தூத்தூர் கிராமத்திற்கு முக்கிய இடமுண்டு.  ஒருமுறை தூத்தூர் பகுதி விளையாட்டு வீரர்கள் ஒரு குழுவாக தமிழ அணிக்கு எதிராக விளையாடி வென்றார்கள்.

தற்போது இந்திய அளவிலான சந்தோஷ் கோப்பைக்கான தமிழக அணியில் தூத்தூர் ரீகன் கேப்டனாக இருக்கின்றார். அவருடன், வள்ளவிளை ஜாக்சன் தாஸ், கொல்லங்கோடு ஷினுவும் அணியில் இருக்கின்றார்கள். என்னுடைய நண்பர் தூத்தூர் ஆன்றணி சேவியர் 2000-ல் சந்தோஷ் கோப்பைக்கான தமிழக அணியின் கேப்டனாக இருந்தார் [என்று நம்புகின்றேன்]. உச்சமாக இந்திய தேசிய கால்பந்து லீக் போட்டியில் தூத்தூர் ஷெரின் விளையாடினார். இவை சில உதாரணங்கள் மட்டுமே. இன்னும் வெளிநாட்டு அணிகளுக்கா விளையாடவேண்டும். அதையும் சாதித்துவிடுவார்கள்.

[நண்பர்கள் தூத்தூர் ஜுட்ஸ், இரவிபுத்தன்துறை ஜெகன், ராபினின் தம்பி ஜெகன், சின்னத்துறை எட்வின் ராஜ் ஆகியோரும் சந்தோஷ் கோப்பை போட்டியில் விளையாடியிருக்கின்றார்கள். தூத்தூரிலிருந்து ரீகன், பிரிட்டோ, மற்றும் ஜோபின், கொல்லங்கோடு ஷாஜின், இரவிபுத்தன்துறை சூசை ஆகியோர் ஐந்து பேர் கடந்த வருடம் சந்தோஷ் கோப்பைக்கான தமிழக அணிக்காக விளையாடினார்கள் . அதுபோல், சந்தோஷ் கோப்பைக்கான புதுச்சேரி அணிக்காக  தூத்தூர் டயர்வின் 2005 மற்றும் 2006-ம் ஆண்டுகளில் விளையாடினார்.]

என்னுடைய சிறுவயதில், ஆண்கள் அணிக்கு இணையாக தூத்தூர் பெண்கள் கால்பந்தாட்ட அணியும் மிகப்பிரபலம். நான் ஏழாம் வகுப்பு படிக்கும்போது மேழ்சி டீச்சர் வகுப்பு ஆசிரியையாக வந்திருந்தார். அவரது முதல் மாணவர்கள் நாங்கள். அவர் அப்போது எங்களுக்கு மிகவும் அறிமுகமானவராக இருந்தார். தூத்தூர் கால்பந்தாட்டக்குழுவின் சிறந்த வீராங்கனை. அடுத்த வருடம் மார்த்தாண்டன்துறை புனித அலோசியஸ் பள்ளியிலிருந்து தூத்தூர் பயஸ் மேல்நிலைப்பள்ளிக்கு மாற்றலாகிச் சென்றார். அப்போது கடற்கரைகளில் பெண்களை பள்ளிக்கு அனுப்புவதில் தயக்கம் காட்டும் காலகட்டம். தூத்தூர் மட்டும் கல்வியிலும் விளையாட்டிலும் எப்படி சிறந்து விளங்குகின்றது என்ற கேள்வி எனக்கு எப்போதுமுண்டு.

நண்பர்கள் கேட்டுக்கொண்டதற்கிணங்க, இரண்டு மூன்று நாட்கள அவகாசத்தில் துறைவன் நாவலை ஊரில் வெளியிடுவதற்காக தூத்தூர் பகுதியின் முக்கியமான பெரியவர்களையும், என்னுடைய ஆசிரியர்களையும் அழைப்பதாக முடிவெடுத்து புனித பயஸ் மேல்நிலைப்பள்ளியின் தலைமை ஆசிரியர், திரு. பெனடிக்ட் சாரை பார்க்கச்சென்றிருந்தேன். அப்போது, பல வருடங்களுக்குப்பிறகு, மேழ்சி டீச்சரை பள்ளியில் வைத்துக்கண்டேன்.  அப்படியேதான் இருக்கின்றார். எனக்குத்தான் வயதாகிவிட்டது. அடுத்த வருடம் அவர் ஒய்வு பெறவிருப்பதை புன்னகையோடு சொன்னார்.

பள்ளியில் மணியடித்து ‘நீராருங் கடலுடுத்த’ தமிழ்த்தாய் வாழ்த்து பாடும்போது ஒருசில மாணவர்கள் மெதுவாக வந்தார்கள். “கிரேசி டீச்சர் நல்ல வேள ரிடையர்டு ஆயாச்சு. இல்லண்ணா தெரியப்பாத்தது. அயாளுக்க விசிலு இப்போ யாரிட்ட இருக்கு?” சின்னத்துறை கிரேசி டீச்சர். தன் விசில் சத்தத்தால் ஒட்டுமொத்த பள்ளியையும் தன் கட்டுப்பாட்டுக்குள் வைத்திருந்த உடற்கல்வி ஆசிரியை.

கடந்த வருடம் கனடாவில் ஐவி-லிண்டாவின் வீட்டிற்கு சென்றிருந்தபோது கிரேசி டீச்சரை சந்திக்கும் வாய்ப்பு கிடைத்தது. லிண்டாவின் அம்மா. அவரது பேரக்குழந்தையை பார்க்க வந்திருந்தார். அவரது கல்வி, பள்ளிக்கூடம் மற்றும்  விளையாட்டு சம்பந்தமான அவரது அனுபங்களை என்னுடன் பகிர்ந்துகொண்டார். தூத்தூர் பள்ளி நீச்சலிலும் சிறந்து விளங்கியது. மாணவிகளுக்கு ஆற்றில் வைத்து நீச்சல் பயிற்சி கொடுத்து டெல்லி வரை அழைத்துச் சென்றிருக்கின்றார்.

தூத்தூர் மகளிர் கால்பந்தாட்ட அணி ஒரு வரலாறு. ஒருவார கால அவகாசத்தில் தூத்தூர் பெண்கள் முதல் கால்பந்தாட்ட அணி உருவாக்கி பயிற்சி கொடுத்திருக்கின்றார். அதில் என்னுடைய ஆசிரியை மேழ்சி டீச்சரும் உண்டு. அப்போது அந்த அணியில் வயது குறைந்தவர் அவர்தான். உயரமோ, குள்ளமோ, குண்டோ, ஒல்லியோ அனைவருக்கும்  ஒரே அளவிலான ஜெர்சி. தனித்தனி அளவில் ஜெர்சி  தைக்க கால அவகாசமின்றி உருவானது அந்த அணி.

“பிள்ள, எல்லாம் எனக்க பிள்ளைங்க. நான் என்ன சொன்னாலும் கேக்கும். ராணி, மேழ்சி, பின்ன எனக்க தங்கச்சி… அவ இப்போ போலீஸ் இன்ஸ்பெக்டராட்டு இருக்கா. அதுபோல, புத்தன்துறை அமலோற்பவம். அவளும் இப்போ இன்ஸ்பெக்டர்தான்.”

“நான் ஒண்ணு சொன்னா நீ நம்பமாட்ட… நான் எனக்க மூத்த மகள பிரவிச்சு ஒரு மாசம் முடியுததுக்குள்ள, விளையாட்டுப்போட்டிக்கு ஸ்கூல் பிள்ளைகளையும் கொண்டு டெல்லிக்கு போனேன். எப்பவும் வெளியூருக்கு  வெளையாட்டுப்போட்டிக்கு கொழந்தைகளையும் கொண்டு போகணும். மூத்தவள கவனிச்சதெல்லாம் எனக்க தங்கச்சிதான்.”

அவ்வாறு உரம் போட்டு வளர்க்கப்பட்டது தூத்தூர் கிராமத்தின் விளையாட்டுத்திறன். இதே அர்ப்பணிப்பை இப்போதும் அனைவரிடமும் காணலாம். பெண்கள் கால்பந்து அணியை மீண்டும் உருவாக்கவேண்டுமென்று நேதாஜி நிர்வாகிகளிடம் ஒரு வேண்டுகோளாக வைக்கின்றேன். இந்தியாவின் பெண்கள் கால்பந்தாட்டத்திற்கான இடம் காலியாகவே இருக்கின்றது.

அதுபோல், கடலோர மக்கள் சங்கத்தை உருவாக்கிய திரு. சேவியர் சார், திரு. ரைமண்ட் சார், அதைப்போல், சிறந்த கால்பந்தாட்ட வீரரும், என்னுடைய கணித ஆசான் முனைவர் வில்பிரட் சார் போன்ற பலரும்   இருக்கின்றார்கள். இவர்களுக்கு முன் நான் ஒன்றுமில்லை. இவர்களை வைத்துக்கொண்டு எனக்கு விருது என்பதை நினைத்துப்பார்க்க முடியவில்லை. எனவே பலமுறை உறுதிப்படுத்த வேண்டியிருந்தது.

“இது உங்களுக்கு மட்டுமில்ல. ஜோஸ் அண்ணனுக்கும் உண்டு. இதுபோல வேற ஆட்களுக்கும் உண்டு. உங்களுக்கு சமுதாய அக்கறையோடு எழுதுவதில. வாழ்த்துக்கள்!” என்று நண்பர் சொன்னதும் திருப்திவந்தது. தூத்தூர் பகுதியின் சாதனையாளருக்கான 2017-ம் ஆண்டிற்கான நேதாஜி விருது பெறும் அனைவருக்கும் வாழ்த்துக்கள்.

தூத்தூர் பகுதியின் சமுதாய மறுமலர்ச்சிக்கும், முன்னேற்றத்திற்கும் உழைத்த அனைத்து பெரியவர்களையும் நேதாஜி நூலகம் வாழ்நாள் சாதனையாளர்கள் – அப்படியொரு விருதை இதுவரை அறிவிக்காத பட்சத்தில் – விருதளித்து கவுரவிக்க வேண்டுமென்று நிர்வாகிகளை அன்புடன் கேட்டுக்கொள்கின்றேன்.

நேதாஜி விருதிற்கு என்னை தேர்தெடுத்ததற்கு மீண்டும் ஒருமுறை என்னுடைய நன்றியை தெரிவித்துக்கொள்கின்றேன்.

தூத்தூர் நேதாஜியின் ஒருநாள் கால்பந்தாட்டத் திருவிழா வெற்றிபெற என்னுடைய மனமார்ந்த வாழ்த்துக்கள்!